Загрузка...

სკანდალური ინფორმაცია-რუსული სპეცსამსახურები და მოკლული ქართველი სპეცრაზმელები

  • 2016-05-29 17:46:09
  • 2713 ნახვა
img

2007 წლის ოქტომბერში კოდორის ხეობაში ჩატარებული სპეცოპერაციის დროს საქართველოს სპეცსამსახურის თანამშრომლებმა რუსი პოლკოვნიკი მოკლეს, რომელიც ტყეში აფხაზური ე.წ. ჯარის წარმომადგენლებს წვრთნიდა. „ქართული გაზეთი“ ვრცელ სტატიას აქვეყნებს, სადაც შინაგანი ჯარის ყოფილი სარდლის გოგი თათუხაშვილის ანალიზზე დაყრდნობით აღწერილია, როგორ იძიეს შური რუსული სპეცსამსახურების წარმომადგენლებმა: კოდორის სპეცოპერაციის მონაწილე სამი პირი დაპატიმრებულია 2013 წლიდან. ექვსი პირი საქართველოდან გაქცეულია, ხოლო ექვსი პირი გარდაცვლილია საეჭვო ვითარებაში, დანარჩენი რამდენიმე კი, როგორც გენერალი თათუხაშვილი ამბობს, გადაბირებულია. ამ სპეცოპერაციიდან ერთ თვეში, 2007 წლის 27 ოქტომბერს რუსულ მედიაში, კონკრეტულად კი „რია ნოვოსტიში“, გამოქვეყნდა სტატია, სადაც ეწერა, რომ რუსეთის საგარეო საქმეთა სამინისტრო აფხაზ მესაზღვრეებზე თავდასხმის ორგანიზატორებისა და შემსრულებლების გამოვლენასა და დასჯას ითხოვდა. წინა ხელისუფლება მსგავს მოთხოვნებს არანაირი ფორმით არ აკმაყოფილებდა. უფრო მეტიც, რუსული სპეცსამსახურების აგენტურისა და ტერორისტული აქტების ჩამდენი პირების გამოვლენისა და დაკავებისთვის არაერთი ოპერაცია განხორციელდა, ხოლო მაშინ საქართველოს პრეზიდენტმა მიხეილ სააკაშვილმა პირდაპირ გაეროს ტრიბუნიდან ხმამაღლა თქვა: „კოდორის ხეობა არის საქართველოს ნაწილი, ისევე, როგორც აფხაზეთი მთლიამად. რას აკეთებდა რუსი პოლკოვნიკი, სამხედრო ინსტრუქტორი ჩვენს ტყეებში? მათთან რა, ნაკლებ ტერიტორიაზეა ტყეები?“ 2012 წელს ხელისუფლების შეცვლის შემდეგ ტერორიზმისა და ჯაშუშობის ბრალდებით დაკავებული პირების ნაწილი გათავისუფლდა, გათავისუფლდა სპეცოპერაცია „ენვერის“ დროს პატიმრობა მისჯილი პირი მეტსახელად „კოჭოია“. ახალი ხელისუფლების მტკიცებით, „კოჭოია“ რუსულ სპეცსამსახურებთან კავშირში არ იყო. 2012 წლის შემდეგ ხშირად ისმის ბრალდებები და არგუმენტირებული კითხვები ხელისუფლების მიმართ, რომ ისინი რუსული სპეცსამსახურების პირდაპირი დაკვეთით აკავებენ და პატიმრობას უსჯიან ქართველ სპეცრაზმელებს, ოკუპირებულ რეგიონში განხორციელებული სხვადასხვა ოპერაციების მონაწილეებსა და ომის ვეტერანებს. შინაგანი ჯარის ყოფილი სარდალი გოგი თათუხაშვილი პირველი იყო, რომელმაც მსგავს ღონისძიებებში მონაწილე სამხედროების გარდაცვალებისა და თუ პატიმრობის საქმეში რუსული სპეცსამსახურების კვალის ძებნა დაიწყო და ლოგიკურ ჯაჭვს გაჰყვა. მან გამოთქვა ეჭვი, რომ სამხედრო პირების გარდაცვალება სულაც არ იყო უბედური შემთხვევების ან მათი ჯანმრთელობის გაუარესების ბრალი. „ქართულ გაზეთთან“საუბრისას ბატონი გოგი ცალსახად აღნიშნავს, რომ სამხედრო პირების მკვლელობები უშუალოდ უკავშირდება რუსული სპეცსამსახურების დაკვეთას და, რაც ყველაზე უარესია, ამ შურისძიების ხელშემწყობი საქართველოს ახალი ხელისუფლება გამოდის. როგორც თათუხაშვილი ჰყვება, საქართველოს პროკურატურაში სამხედრო პირების დაკითხვას რუსული სპეცსამსახურების ორი წარმომადგენელი მუდმივად ესწრებოდა. თემა კი, რომელიც რუსული მხარისთვის მეტად მნიშვნელოვანი იყო, 2007 წელს კოდორში ჩატარებული სპეცოპერაციაა. რუსული მხარე მოითხოვდა, რომ ქართველ სამხედროებს ეღიარებინათ აფხაზეთში სამშვიდობოებზე თავდასხმა. როგორც თათუხაშვილი ამბობს, სწორედ ამ მიზნით, ჯერ შს სამინისტრო და პროკურატურა იტაცებდა სპეცოპერაციაში მონაწილე პირებს, შემდეგ კი მათ წამებით აიძულებდნენ გრუ-სთვის სასურველი ჩვენების მიცემას. დაკითხული პირებიდან ყველა სხვადასხვა გარემოებებში გარდაიცვალა. აღსანიშნავია, რომ კოდორის სპეცოპერაციის მონაწილე სამი პირი დაპატიმრებულია 2013 წლიდან. ექვსი პირი საქართველოდან გაქცეულია, ხოლო ექვსი პირი გარდაცვლილია საეჭვო ვითარებაში, დანარჩენი რამდენიმე კი, როგორც გენერალი თათუხაშვილი ამბობს, გადაბირებულია. ფაქტი ერთია - რუსული მხარე ჯერ კიდევ მიხეილ სააკაშვილისგან მოითხოვდა „კოდორი 2007“ მონაწილეების დასჯას. ბუნებრივია, მაშინდელ ხელისუფლებას ეს მოთხოვნა არც პირდაპირ და არც ირიბად არ დაუკმაყოფილებია, სწორედ ამიტომ, 2010 წლის 5 მაისს ბათუმში, საკუთარ ავტომანქანაში ააფეთქეს დიმიტრი კორძაძე. კორძაძე 2004-2007 წლებში მუშაობდა შინაგან საქმეთა სამინისტროს განსაკუთრებულ დავალებათა მთავარ სამმართველოში, იყო განსაკუთრებულ დავალებათა ზუგდიდის მე-2 სამმართველოს უფროსი და მონაწილეობდა 2007 წლის კოდორის სპეცოპერაციაში. ბოლო წლებში ის იყო აჭარის საგანგებო სიტუაციების მართვის უფროსიც. აფეთქებიდან რამდენიმე დღეში დიმიტრი კორძაძის მკვლელობა შს სამინისტრომ გახსნა. საქართველოს შინაგან საქმეთა მაშინდელი მინისტრის, ვანო მერაბიშვილის განცხადებით, მკვლელობის უკან რუსული სპეცსამსახურები იდგნენ და მოტივი შურისძიება იყო. შს სამინისტრომ გაშიფრა სქემა, რომლის მიხედვითაც კორძაძის მკვლელობის დაკვეთა მოხდა. 2009 წელს მოპარული ავტომანქანების რეალიზატორებს - ოთარ როგავასა და თემურ ბუთბაიას - დაუკავშირდნენ ცნობილი აფხაზი კრიმინალი ვალმერ ბუთბა და აფხაზეთის მარიონეტული რეჟიმის პარლამენტის წევრი სლავიკ ვარდანია და მათ ორი რუსი მამაკაცი გააცნეს. რუსებმა ოთარ როგავასა და თეიმურაზ ბუთბაიას დიმიტრი კორძაძის ფოტოსურათი გადასცეს და მისი საცხოვრებელი ადგილისა და გადაადგილების მარშრუტის დადგენა სთხოვეს. ამ დავალების შესასრულებლად, ავანსის სახით, როგავამ და ბუთბაიამ 5 000 აშშ დოლარი მიიღეს. „საქმის შესასრულებლად” მათ დახმარება ბათუმელ მეგობრებს - დავით როყვას, გიორგი გაბუნიას, ლევან ქარცხავას სთხოვეს და მათი მეშვეობით დაადგინეს ოფიცერ კორძაძის გადაადგილების მარშრუტი. შსს-ს ცნობით, 2010 წლის მარტში აფხაზეთის ოკუპირებულ ტერიტორიაზე როგავა და ბუთბაია ისევ შეხვდნენ რუსეთის მოქალაქეებს და მათგან მიიღეს დავალება კორძაძის აფეთქების შესახებ. ასევე, მიიღეს ასაფეთქებელი მოწყობილობა და კიდევ 5000 აშშ დოლარი. 2010 წლის 5 მაისს ბუთბაიამ მოწყობილობა კორძაძის მანქანაში დაამონტაჟა. ოფიცრის მკვლელობის შემდეგ ბუთბაია და როგავა დამკვეთებს ისევ აფხაზეთის ტერიტორიაზე შეხვდნენ და მათგან გასამრჯელოდ 42 000 ათასი აშშ დოლარი მიიღეს. შსს-მ დანაშაულის ჩადენისა და ხელშეწყობის ბრალდებით თემურ ბუთბაია, ოთარ როგავა, დავით როყვა და ლევან ქარცხავა დააკავა. ოთარ როგავამ ციხის საპყრობილეში თავი მოიკლა. როგორც გაირკვა, დამკვეთები, რომლებიც დავალების შემსრულებლებს აფხაზეთში ხვდებოდნენ, რუსეთის თავდაცვის სამინისტროს მთავარი სადაზვერვო სამმართველოს (გრუ-ს) თანამაშრომლები იყვნენ. მაშინ შს მინისტრი აცხადებდა, რომ ამის უტყუარი მტკიცებულებები არსებობდა. ამის შემდეგ რუსული სპეცსამსახურები საქართველოს ტერიტორიაზე სხვადასხვა სახის ტერორისტული აქტების დაკვეთით იყვნენ დაკავებული, 2012 წელს ახალი ხელისუფლების მოსვლიდან მალევე პროკურატურამ მაღალი თანამდებობის პირებისა და სამხედრო მოსამსახურების დაკავება და სხვადასხვა საქმეზე მათი დაკითხვა დაიწყო. ასე დააკავეს 2012 წელს ე.წ. „ხურჩის ტერაქტზე“ აფხაზეთის ავტონომიური რესპუბლიკის მთავარი სამმართველოს ყოფილი უფროსი რომან შამათავა. მისი დაკავების გამო ოპოზიციამ ახალი ხელისუფლება და პროკურატურა საქართველოს სახელმწიფო ინტერესების წინააღმდეგ მოქმედებაში დაადანაშაულა. ოპოზიცია ცალსახად აცხადებდა, რომ შამათავას დაკავება რუსული სპეც. სამსახურების დაკვეთა იყო. ცნობილი გახდა, რომ შამათავას წინააღმდეგ საქმეში მტკიცებულებად სერგეი ბაღაფშის ინტერვიუ და აფხაზეთის დე-ფაქტო სამართალდამცავების განცხადებებიც შეიტანეს. საპარლამენტო უმცირესობის წევრი ნუგზარ წიკლაური მაშინ აცხადებდა, რომ საქმეში, მისი ინფორმაციით, იდო ვლადიმერ არლანის და რუსი ე.წ. სამშვიდობო ძალების წარმომადგენლის ალექსანდრ დორდიევისა და, ასევე, რუსლან ქიშმარიას განცხადებები. ამ ყველაფრით კი, ბრალის წარდგენისას, საქართველოს პროკურატურამ იხელმძღვანელა. შამათავას დაკავების შემდეგ დააკავეს ასევე, „კოდორი 2007“-ის მონაწილე აფხაზეთის კუდ-ის მაღალჩინოსანი ალექსანდრე დანელია, რომელსაც ჩვენება რომან შამათავას წინააღმდეგ ზეწოლით მიაცემინეს. თუმცა, ვიდრე შსს დანელიას დაკავების შესახებ ოფიციალურად განაცხადებდა, ის რამდენიმე დღე გამქრალი იყო. როგორც მოგვიანებით თვითონ თქვა, ის გატაცებული ჰყავდათ და კონსპირაციულად კითხავდნენ. მოგვიანებით კი დანელია საკუთარ სახლში გარდაცვლილი იპოვეს - ოფიციალური ვერსიით, მან თავი მოიკლა. „დანელია იყო ომის ვეტერანი. ხურჩის და მოწინააღმდეგის მიერ კონტროლირებად სხვა ტერიტორიებზე ჩატარებული ანტი-ტერორისტული სპეცოპერაციების მონაწილე. სპეცოპერაცია „კოდორი-2007“-ის დროს ჰქონდა საძახისი „იუსტასი“, რომელიც შემდეგ შერჩა ზედმეტსახელად. 2012 წლის 13 ნოემბერს ალექსანდრე დანელია შინაგან საქმეთა სამინისტროს გენერალური ინსპექციის თანამშრომლებმა გაიტაცეს. ფაქტი შინაგან საქმეთა სამინისტრომ არც მაშინ დაადასტურა. გატაცებიდან მხოლოდ 22 დღის შემდეგ, 2012 წლის 4 დეკემბერს, გაკეთდა ოფიციალური განცხადება მისი დაკავების შესახებ. 2013 წლის 20 ოქტომბერს, დაღუპვამდე რვა დღით ადრე, ალექსანდრე დანელიამ განაცხადა, რომ ის და სერგო უბილავა იყვნენ გატაცებულნი. 2013 წლის 24 ნოემბერს ალექსანდრე დანელია ცეცხლსასროლი იარაღიდან მიღებული ორი ჭრილობის შედეგად გარდაცვლილი იპოვეს. მკვლელობას ადასტურებს ის გარემოებაც, რომ განხორციელებულია ორი გასროლა და ტყვია, რომელმაც დანელიას სიკვდილი გამოიწვია, მარცხენა მკერდის მხრიდან გამოვიდა და მარცხენა ხელზეც მოხვდა“ - ამბობს გოგი თათუხაშვილი. აქვე საინტერესოა ის დეტალიც, რომ ალექსანდრე დანელია საკუთარ საცხოვრებელ სახლში გარდაცვლილი სწორედ რომან შამათავას საქმის გამომძიებელმა იპოვა. დანელიასთან ერთად ჯერ გაიტაცეს და მერე დააპატიმრეს „კოდორი 2007“ მონაწილე სერგო უბილავა. აფხაზეთის მთავარი სამმართველოს მეორე სამმართველოს ყოფილი უფროსი სერგო უბილავა 2003 წლიდან შინაგან ჯარში მსახურობდა. 2005-2012 წლებში - მუშაობდა კონსტიტუციური უსაფრთხოების დეპარტამენტის აფხაზეთის მთავარ სამმართველოში. იყო ომის ვეტერანი. „კოდორი 2007“-ის გარდა, უბილავა, ასევე, იყო ხურჩისა და სხვა მოწინააღმდეგის მიერ კონტროლირებად ტერიტორიებზე ჩატარებული ანტიტერორისტული სპეცოპერაციების მონაწილე. 2012 წლის 13 ნოემბერს აფხაზეთის კუდის თანამშრომელი სერგო უბილავა ალექსანდრე დანელიასთან ერთად შინაგან საქმეთა სამინისტროს გენერალური ინსპექციის თანამშრომლებმა გაიტაცეს. ფაქტი შინაგან საქმეთა სამინისტრომ არ დაადასტურა. აქაც გატაცებიდან მხოლოდ 22 დღის შემდეგ, 2012 წლის 5 დეკემბერს, გაკეთდა ოფიციალური განცხადება ოფიცრების დაკავების შესახებ. 2014 წლის თებერვლის დასაწყისიდან სერგო უბილავა ამუშავეს „კოდორი 2007“-ის სპეცოპერაციის თემაზე“ - ამბობს თათუხაშვილი. მისივე თქმით, უბილავასაც ჯერ კონსპირაციულ ბინაში კითხავდნენ, შემდეგ კი, პროკურატურაში - ოფიციალურად, დაკავების ოფიციალური ვერსია იყო „ხურჩის ტერაქტი“, მაგრამ თათუხაშვილის ინფორმაციით, ის იკითხებოდა „კოდორი 2007“ საქმეზე და მისგან წამებით ითხოვდნენ რუსული სპეცსამსახურებისთვის სასურველი ჩვენების მიცემას. „როცა ვერ მოიპოვეს მისგან სასურველი ჩვენება, დაიწყეს მედიკამენტოზური ზემოქმედება, რასაც ვერ გაუძლო სპეცრაზმელმა. უბილავა 2014 წლის 17 მარტს ციხეში გარდაიცვალა. სრულიად ჯანმრთელი ადამიანის, სპეცრაზმელისა და სპორტსმენის გარდაცვალების ოფიციალურ მიზეზად ციროზი დასახელდა“ - ამბობს თათუხაშვილი. „კოდორი 2007“ საქმეზე ჩვენების გამოძალვას ცდილობდნენ შალვა თათუხაშვილისგან. 2014 წლის 25 თებერვალს ის გაიტაცეს და 20 დღეზე მეტხანს ჰკითხავდნენ, როგორც ნავთლუღის სპეცოპერაციის, ასევე, კოდრის სპეცოპერაციის საქმეზე. როგორც მისი მამა გოგი თათუხაშვილი აცხადებს, პროკურატურაში შალვა თათუხაშვილისა და უბილავას დაკითხვას რუსი სპეცსამსახურების ორი წარმომადგენელი ესწრებოდა. ეს ინფორმაცია, როგორც თავად თათუხაშვილი „ქართულ გაზეთთან“ აცხადებდა, მათ მიაწოდა თავად შალვა თათუხაშვილმა, რომელიც დაკითხვებიდან რამდენიმე წუთით დააბრუნეს სახლში. „სერგო უბილავას პარალელურად მიდიოდა შალვას დამუშავებაც. ორივე სპეცრაზმელის დაკითხვას ესწრებოდა რუსეთის სპეც. სამსახურების ორი წარმომადგენელი. დაკითხვები მიმდინარეობდა ფიზიკური და ფსიქოლოგიური ზეწოლის ქვეშ. მიუხედავად ამისა, მათ ჩვენება რუსული სპეცსამსახურების სასარგებლოდ არ მიუციათ, რამაც აიძულა სპეცსამსახურების წარმომადგენლები მედიკამენტოზურ ზემოქმედებაზე გადასულიყვნენ. ამის შემდეგ, მათ, ნაწილობრივ, მიიღეს სასურველი ჩვენებები, თუმცა, მათი მთავარი თემა - „კოდორი-2007“ ღიად დარჩა. ზემოაღნიშნულ ფაქტს რომ არ დამატებოდა მეორე „ციროზიანი“, 22-დღიანი გატაცების შემდეგ, 18-ში გამთენიისას, მოაწყვეს ინსცენირება - შალვა თათუხაშვილი მიიყვანეს და ათ წუთში „აიყვანეს“ ლილოს ღამის კლუბიდან“ - ამბობს თათუხაშვილი. 2014 წლის 23 მარტს შალვა თათუხაშვილი გარდაიცვალა. როგორც მისი ოჯახის წევრები აცხადებენ, გარდაცვალების მიზეზი პროკურატურაში მასზე განხორციელებული ფსიქოლოგიური, ფიზიკური და მეტიკამენტოზური წამება გახდა, რაც მათ მიერ ჩატარებულმა დამოუკიდებელმა ექსპერტიზამაც დაადასტურა. შალვა თათუხაშვილის გარდაცვლებიდან ზუსტად ერთ თვეში ავტოკატასტროფაში მოჰყვა და გარდაიცვალა თათუხაშვილის მძღოლი ივანე ივანიძე. ივანიძე 1995 წლიდან შინაგან ჯარში მსახურობდა. გოგი თათუხაშვილი თვლის, რომ არც ივანიძის გარდაცვალება ყოფილა უბედური შემთხვევის ბრალი და ესეც დაგეგმილი მკვლელობა იყო. ასევე, ეჭვს იწვევს აფხაზეთის ავტონომიური რესპუბლიკის სუსი-ს სპეცრაზმის უფორისის,ზვიად ლაგვილავას გარდაცვალების საეჭვო დეტალები. ლაგვილავა ასევე იყო კოდორის სპეცოპერაციის მონაწილე. როგორც ლაგვილავას საქმეზე მიმდინარე გამოძიების ფარგლებში მისი ადვოკატი მოწმეთა ჩვენებებზე დაყრდნობით აცხადებს, ლაგვილავას მკვლელობა წინაწარ დაიგეგმა და განხორციელდა, კვალის დაფარვის მიზნით კი სუს-ის შენობაში დაზიანებული წყლის ავზი დამონტაჟდა, რომლის აფეთქებაც მოხდა და ინსცენირება მოეწყო, თითქოს ლაგვილავას გარდაცვალება ავზის აფეთქებამ გამოიწვია. ლაგვილავას ოჯახი და მისი ადვოკატი თვლიან, რომ ლაგვილავა მის ხელთ არსებული საიდუმლო ინფორმაციის გამო მოკლეს, რომელიც ზუგდიდში კონტრაბანდის შეტანასა და რეალიზებას ეხებოდა. მაგრამ, გოგი თათუხაშვილი ჩვენთან საუბარში აცხადებს, რომ ეს ინფორმაცია ისედაც ცნობილია სამეგრელოში და ლაგვილავას მკვლელობაშიც რუსულ კვალს ხედავს: „ისედაც მთელმა ზუგდიდმა იცის, რომ ადგილობრივი ხელისუფლება ოკუპირებული ტერიტორიიდან შემოტანილი კონტრაბანდის რეალიზებას ეწევა. შესაბამისად, მე ვთვლი, რომ ლაგვილავას მკვლელობა ამ საქმეს არ უკავშირდება. ესაა რუსული სპეცსამსახურების შურისძიება მასზე, როგორც კოდორის სპეცოპერაციისა და სხვა ანტიტერორისტული ოპერაციებში მონაწილე სპეცრაზმელზე. როგორც სხვები, ლაგვილავაც რუსული სპეცსამსახურების დაკვეთითაა მოკლული“ - აცხადებს თათუხაშვილი. კიდევ ერთი გახმაურებული მკვლელობა, რომელშიც უშუალოდ ფიგურირებენ რუსულ სპეცსამსახურებთან დაკავშირებული პირები, წელს მოხდა. სამეგრელო-ზემო სვანეთის მთავარი პროკურორი ვახტანგ ქირია ჯერ გაქრა, შემდეგ კი ის მოკლული იპოვეს. მის მკვლელობაში ეჭვმიტანილის ბიძინა კუჭავას დაკავების მცდელობისას, გამოძიების ვერსიით, მან თავი მოიკლა. კუჭავას გარდაცვალების დროს შემთხვევის ადგილზე იმყოფებოდა რუსეთის მოქალაქე ცოლ-ქმარი გვარად პოპოვები, რომელებიც გამოძიების ვერსიით, კუჭავას ქირიას მკვლელობის შემდეგ ქვეყნის დატოვებაში ეხმარებოდნენ. კუჭავას ოჯახს არ სჯერა ვერსიის, რომ მან თავი მოიკლა და რომ თვითმკვლელობამდე ჯერ ვახტანგ ქირია მოკლა. არაოფიციალური ვერსიით, კუჭავაც და ქირიაც სულ სხვა პირებმა მოკლეს. არსებობს კიდევ ერთი ვერსია, რომლის მიხედვითაც, შესაძლოა, კუჭავას რუსული სპეცსამსახურების დავალებით მართლაც მოეკლა ქირია, რომელსაც სამეგრელო-ზემო სვანეთში ჩატარებული სპეცოპერაციების შესახებ საკმაოდ ბევრი ინფორმაცია ჰქონდა და ამ რეგიონში ნესბისმიერი საჭირო ინფორმაციის მოპოვებაც შეეძლო. რაც შეეხება კუჭავას, ის, ლოგიკური ვარაუდით, თავად დამკვეთებმა მოიშორეს. ყველაზე მთავარი დეტალი აქ ისაა, რომ სააგენტო „აქცენტმა“ საკუთარ წყაროზე დაყრდნობით მაშინვე გაავრცელა ინფორმაცია, რომ დავით პოპოვი რუსული დაზვერვის არაოფიციალური აგენტი იყო. სააგენტოს წყარო საუბრობდა მკვლელობების მიზეზებზეც: „დავით პოპოვი დიდი ხანი, ძალიან კარგად იცნობდა ბიძინა კუჭავას. პოპოვისნაირი ხალხი საჭირო ნაცნობობას ყოველთვის პოულობს. წლების წინ კაზინოში გაიცნეს ერთმანეთი. არ ვიცი, მაშინ პოპოვს დაგეგმილი ჰქონდა ეს ნაცნობობა თუ არა, მაგრამ ისინი საქმიანად დამეგობრდნენ. პოპოვი ეძებდა ადამიანს, ვისაც ხელეწიფებოდა აფხაზეთის მაცხოვრებლებთან ურთიერთობა. ამისთვის პოპოვი კუჭავას, როგორც ჯაშუშს, დიდი ოდენობით ფულს გადაუხდიდა, ოღონდ საკავშირო ადამიანი უნდა ყოფილიყო არაცნობადი, არა დიდი პოსტის მქონე, შეუმჩნეველი ფიგურა. ეს ჯაშუშური ლოგიკაა. სწორედ ასეთი იყო ვახტანგ ქირიაც. მას ძალიან ბევრი კონტაქტი ჰქონდა, ნებისმიერი ინფორმაციის გაცვლა-გამოცვლაზე მიუწვდებოდა ხელი. მოგეხსენებათ, ზუგდიდში ძალიან ბევრი აფხაზი გადმოდის. უბრალოდ, ეს ნაკლებად ხმაურდება. გახსოვთ, ალბათ, ოკუპირებული აფხაზეთის ტერიტორიაზე ქართული ჯაშუშური ქსელი რომ ჩავარდა. ათამდე ქართველი ჯაშუშია დაჭერილი და გასამართლებული. ერთ-ერთი დავით ნარმანიას ბიძაშვილი ზურაბ თორაძე იყო. ეს ყველაფერი რუსების ხელით ხდება. ქირიას მკვლელობას რომ დავუბრუნდეთ, კუჭავას მისი მოკვლა დაევალა. სავარაუდოდ, ქირიამ ან არ შეასრულა პოპოვი-კუჭავას მორიგი დავალება, ან შეასრულა და თავიდან მოიცილეს, როგორც ინფორმაციის მატარებელი. რაც შეეხება კუჭავას გარდაცვალებას, მოიკლა მან თავი თუ მოკლეს - ამაზე დაზუსტებით ვერაფერს გეტყვით. გეგმის მიხედვით, კუჭავა პოპოვს რუსეთში უნდა გადაეყვანა, მაგრამ ვერ მოასწრეს. როგორც კი სამართალდამცავები კვალზე დაადგნენ - ან თვითონ გაისროლა, რადგან აზრი არ ჰქონდა, მას დიდი ხნით ჩასვამდნენ, როგორც ქვეყნის მოღალატეს და ჯაშუშს, ან თავად რუსები მოკლავდნენ. არ გამოვრიცხავ, კუჭავა თავად პოპოვს მოეკლა“ („აქცენტი“). იმის მიუხედავად, რომ ქირია-კუჭავას საქმეში მთავარი მოწმეები პოპოვები იყვნენ , გამოძიებამ ისინი მკვლელობიდან დიდი ხნის შემდეგ დაკითხა. თუმცა, მათი დაკითხვის შემდეგაც გამოძიების პირველად ვერსიაში არაფერი შეცვლილა. ყველა ეს დეტალი კი აჩენს ეჭვს, რომ ქვეყანაში რუსული სახელმწიფო დაზვერვა და მათი აგენტურა თავისუფლად მოქმედებს. ისიც ფაქტია, რომ საქართველოს ხელისუფლებას კრემლთან რიტორიკა შერბილებული აქვს. ოკუპანტის წინააღმდეგ მებრძოლ სამხედრო პირებთაგან ნაწილი საეჭვო ვითარებაშია გარდაცვლილი, ნაწილი ქვეყნიდან გაქცეულია, ნაწილს კი ტერაქტების ინსცენირებასა და სხვა მძიმე დანაშაულებებში სდებენ ბრალს და მრავალი წლით უსჯიან პატიმრობას. წყარო: "ქართული გაზეთი" "აფხაზეთის ხმის" დამატება: რუსული მედიის არქივში 2007 წელს მომხდარი შეტაკების ამბები დეტალურად მოიპოვება: 2009 წლის რუსული პრესის არქივში ერთ საინტერესო მასალასაც წავაწყდით, სადაც პირდაპირ სათაურშივეა გამოტანილი, რომ დაღუპულები არა აფხაზი, არამედ რუსი სამხედროები იყვნენ: ჟურნალისტი ოლგა ალენოვა „კომერსანტ.რუს“ დამატებაში წერს: „იმის მიუხედავად, რომ აფხაზური მხარის მტკიცებით, მოკლულები აფხაზურ არმიაში მსახურობდნენ, ამ ფაქტმა, შესაძლოა, სერიოზული პრობლემები შეუქმნას რუსეთის სამშვიდობო ძალების ყოფნას აფხაზეთში“. ჟურნალისტი დასძენს, რომ მოკლულთა გვარები საიდუმლო იყო რამდენიმე დღის განმავლობაში, ხოლო აფხაზური ხელისუფლების ერთერთმა წარმომადგენელმა რუსლან ქიშმარიამ, მართალია, მოკლულთა ვინაობა და ის, რომ ისინი რუსი ოფიცრები იყვნენ, ვერ დამალა, მაგრამ განაცხადა, რომ ისინი აფხაზურ არმიაში კონტრაქტის საფუძველზე მსახურობდნენ: „ისინი რუსი ოფიცრები იყვნენ, მაგრამ აფხაზურ არმიაში კონტრაქტის საფუძველზე მსახურობდნენ. ისინი ტყვარჩელის მთებში (აფხაზური მხარე თავდასხმის ადგილს ტყვარჩელის რაიონად მოიხსენიებდა და არ აღიარებდა, რომ თავდასხმა, სინამდვილეში, ქართული მხარის მიერ კონტროლირებად კოდორის ხეობაში მოხდა, - რედ.) აფხაზ ჯარისკაცებს წვრთნიდნენ“, - თქვა ქიშმარიამ. სტატიაში არის სხვა საინტერესო დეტალებიც. მაგალითად, რუსეთის სამშვიდობო ძალების მეთაურმა კონფლიქტის ზონაში - სერგეი ჩაბანმა, როგორც კი გაცხადდა, რომ მოკლულები არა აფხაზები, არამედ რუსები იყვნენ, გააკეთა განცხადება, რომ არ იცნობს მოკლულებს და მათთან შეხება არასდროს ჰქონია. „კომერსანტ.რუ“ წერს: „ჩვენი მონაცემებით, მოკლულთაგან ერთერთს, პოდპოლკოვნიკ მუზავატკინს უშუალო შეხება ჰქონდა სამშვიდობო ძალებთან. აფხაზეთში ის მაიკოპიდან ჩავიდა და ბოლო ხუთი წლის განმავლობაში ცალკეულ სამშვიდობო დანაყოფებს ხელმძღვანელობდა. გარდაცვალებამდე სულ რაღაც ერთი წლით ადრე პოდპოლკოვნიკი მუზოვატკინი გალის რაიონში დისლოცირებულ 559-ე სამშვიდობო მოტომსროლელ ბატალიონს მეთაურობდა და თათბირებზე ხშირად ხვდებოდა გენერალ ჩაბანსაც“. შეგახსენებთ, რომ როგორც აფხაზური მხარე, ასევე რუსეთის სამშვიდობო ძალების მეთაური სერგეი ჩაბანი ამტკიცებდნენ, რომ თავდასხმა ტყვარჩელის რაიონში, აფხაზური მხარის მიერ კონტროლირებად ტერიტორიაზე მოხდა, თუმცა გაეროს სადამკვირვებლო მისიის წარმომადგენლებს ეჭვი შეეპარათ, რომ აფხაზური მხარის მიერ მითითებული ადგილი ყალბი იყო, ანუ ის ტერიტორია, სადაც ისინი აფხაზმა სამხედროებმა და კრიმინალისტებმა გაიყვანეს, სინამდვილეში სულაც არ იყო ის ადგილი, სადაც შეტაკება მოხდა. ამის დამადასტურებელი ფოტო და მობილურით გადაღებული ვიდეომასალა მათ ქართულმა მხარემ წარუდგინა, რის შემდეგაც მისიამ მიიღო გადაწყვეტილება, დამოუკიდებლად ეწარმოებინა გამოძიება. ამან აფხაზური მხარის გაღიზიანება გამოიწვია და მაშინდელმა დე ფაქტო პრეზიდენტმა სერგეი ბაღაფშმა აფხაზი სამხედროების თანხლების გარეშე გაეროს წარმომადგენელთა გადაადგილება ინციდენტის ადგილის მიმართულებით აკრძალა, რის გამოც გაეროს მისიას სოხუმში არ მიეცა საშუალება, გამოძიება გაეგრძლებინა. წყარო:fmabkhazia.com

loading...

რეკლამა 2 19 09 09

  • img
  • img

ვალუტის კონვერტორი

დღის ფოტო

ონლაინ სესხების
საუკეთესო შემოთავაზებები

  • img
  • 330 x 90
Загрузка...
Загрузка...